Жерімізді көркейтсек, еліміз де көркейеді

 

Төлеби аудандық Қоғамдық кеңес мүшелерінің Ленгір қаласы мен барлық ауылдық округ әкімдері мен жергілікті тұрғындарға, «Nur Otan», «Ақ жол», «Ауыл» және басқа да партиялардың аудандық филиалдарына, аудандық мәслихат депутаттарына, этномәдени орталықтарға, мекемелер мен ұжымдар басшыларына, ардагерлер кеңесі мен ауыл билеріне, жалынды жастарымызға, жалпы барша аудан тұрғындарына

ҮНДЕУІ

Құрметті Төлебиліктер!

Ақ қарлы қыстың көрпесі сөгіліп, жерге де, елге де жылы шуағын сыйлаған көктем келіп жетті. Бірер күнде Табиғат-Анамыз қайта оянып, бар ағаштар бүршік атып, төңірек түрлене түседі. Ата-бабаларымыз «Көктемнің бір күні – жылға азық», «Бір тал кессең, он тал ек» деп ұрпақтарына үлкен өсиет қалдырып кеткендіктен, осы аталы сөздің үдесінен шығып, көктемнің әрбір күнін ұтымды пайдаланып қалайық.

Ауыл әкімдері мен мекеме басшылары, ардагерлер кеңесінің мүшелері мен ауыл билері, қариялар, зиялы қауым өкілдері бас болып, Ленгір қаласы мен аудан аумағындағы барлық елдімекендерді көркейтуге, көгалдандыруға бір кісідей жұмыла кірісіп, қолына күрек ұстай алатын жас баладан еңкейген қартқа дейін өз үлесін қосуға шақырамыз. Біздер, аудандық қоғамдық кеңес мүшелері, аудандағы әр отбасының қанша мүшесі болса, кемінде сонша тал мен терек, жеміс ағаштарын отырғызып, оларды күтімге алып, уақытылы суарып, қараусыз жүрген малдан қорғап, күтіп-баптауға шақырамыз. Бұл әрқайсысымыздың қолымыздан келетіндіктен, соншалықты қиын тірілік емес екенін білесіздер. Егер баршамыз бес саусақтай жұмылып, ынтымақ пен бірліктің нағыз үлгісін танытып, осы игі істі қолға алып, жалғастырсақ қана киелі туған жерімізді жасыл желекке бөлей аламыз.

Кейбір көңіл құлазытатын жағдайға сіздердің баршаңыз да куәсіздер. Жыл сайын көктем мен күз айларында мемлекеттің қыруар қаржысына және демеушілердің көмегімен мыңдаған көшеттер сатып алынып, көшелер мен жол бойларына егіліп жүр. Егер сол көшеттер жаз айларына жетпей-ақ қурап қалмағанда, қазір ауданымыздағы елдімекендердің бәрі жасыл орманға оранып тұрған болар еді. Туған жерімізді осы уақытқа дейін көңілдегідей көркейте алмай жүрсек – бұл өзгенің емес, өзіміздің ғана кемшілігіміз.

Құрметті жерлестер!

Біз, аудандық Қоғамдық кеңес мүшелері, барлық төлебиліктерге үндеу тастай отырып, жергілікті мекемелер мен ұжымдарға, әр отбасыға көшелер мен өз аулаларына алуан түрлі ағаш көшеттері мен гүлдер отырғызып, оларды көздің қарашығындай қорғап, баптап, тазалық пен реттілікті сақтап, үй маңы мен аулаларымызды таза ұстап, туған жеріміздің нағыз иесі болып, көркейте түсуге шақырамыз! Осылайша бір-бірімізге, өзгелерге де үлгі-өнеге көрсетейік. Бұл біздің қолымыздан келетін, ынтымағымыз бен бірлігімізді паш ететін іс.

Ол үшін Ленгір қаласы мен барлық ауылдық округ әкімдерін аудан бойынша көктем айының бір күнін бүкіл аудан тұрғындары үшін сенбілік деп жариялап, жыл сайын жұмылып көшет егуге, арық-атыздарды тазалауға шақырамыз. Қаладағы көпқабатты үйлердің аулалары да тәртіптілік пен рет-тілікті қажет етеді. Ауданның бас имамы бас болып, барлық мешіт имамдары барша мұсылман қауымына тән имандылық пен мейірімділіктің, тазалықтың үлгісін көрсетіп, оларға ауыл қариялары мен көпшілік қолдау көрсетіп, мазараттарды тазалап, жолдары мен шарбақтарын ретке келтіріп, ағаш, гүл көшеттерін отырғызайық. Ауданда 100 мыңнан астам халық тұрады. Бұл – үлкен күш.

Еліміздің халқы биыл Қазақстан Республикасы Тәуелсіздігінің 30 жылдығын атап өтуде. Осы мерейлі мереке құрметіне партияның аудандық филиалдары, аудандық әкімдіктің ішкі саясат және басқа да дербес бөлімдері, ұлттық - этномәдени орталықтар, білім беру мекемелері жұмылып, ауданымызды көркейтуге белсене үлес қосайық.

Туған жеріміздің табиғатына қорған болып, көркейтіп, жасыл желек пен гүлге орап, бүгінгі және келер ұрпаққа үлгі көрсетіп, осындай игі істерімізбен мәңгі өшпестей жарқын із қалдырайық!